durante séculos, paso obrigado
Orixe e evolución
Situada xeograficamente no noroeste da provincia de León, durante séculos foi paso obrigado entre a meseta e as veciñas terras galegas. Esta característica, xunto co xurdimento do Camiño de Santiago, favoreceu o asentamento de diferentes pobos e culturas que impulsaron o crecemento do municipio ao longo dos séculos.
Atopar as súas orixes non é doado, pois, aínda que existen indicios dalgún poboamento prehistórico nas beiras do río Sil, non será ata ben entrada a Idade Media cando se constate a existencia dun asentamento arredor do Camiño de Santiago.
entre ríos e peregrinos
A historia de Ponferrada
A historia de Ponferrada está ligada aos seus ríos e ás súas pontes. Así pois, no século XI o bispo Osmundo de Astorga mandou construír unha ponte sobre o río Sil para facilitar o paso dos peregrinos do Camiño de Santiago.
Esta primeira ponte estaba provista de cadeas de ferro, polo que pasou a chamarse Pons-Ferrata ou Ponte de Ferro, nome que posteriormente se empregou para denominar a cidade de Ponferrada. Máis tarde, no século XVI, ergueuse unha nova ponte de pedra para cruzar o outro río principal, o Boeza, paso que hoxe en día se conserva como uso peonil.
murallas, crecemento e título real
A cidade
No século XII constrúense as primeiras murallas do Castelo de Ponferrada, que acollerán aos cabaleiros templarios chegados para protexer, durante máis dun século, o Camiño de Santiago. Mentres tanto, nos pobos a vida desenvolvíase constante e tranquila. Moitos dos seus habitantes decidiron baixar á vila na procura de mellores oportunidades, incrementando o censo e o crecemento económico da localidade.
O 4 de setembro de 1908 o rei Afonso XIII concede a Ponferrada o Título de Cidade. Transcorrido máis dun século, Ponferrada celébrao cunha nova ponte, a do Centenario. Hoxe Ponferrada é cidade e municipio, desenvolvemento e historia.
Xunto con outros 34 pobos e barrios, ofrece unha grande diversidade e riqueza turística para todos os gustos e idades.
